沒有手拖篋的海港城

唔知由幾時開始，我阿媽決定將每年既團年飯分開兩 Part。通常 Part 1 都會喺過年前一兩個禮拜，喺屋企煮餐勁嘅。而 Part 2 通常喺年三十晚，由我發板去邊度食，一如以往，我只會揀中餐以外嘅餐廳，因為貪佢呢個時候一定無生意，Service 好又唔使同人迫。而地區，每年我都會揀平時極討厭嘅 - 尖沙咀。

近呢幾年，除左年三十晚以外嘅一年三百六十四日我都好少會去尖沙咀，因為我唔太識包容，唔想俾飛劍射中，唔想俾人用心口貼住我背脊排隊、唔想俾手拖篋輾過我對雪白嘅 Air Jordan 11。

但每逢年三十晚，尖沙咀都會係我必去嘅地方，因為呢一晚，佢會變得格外可愛。海港城聽到嘅係廣東話、廣東道見到嘅唔係手拖篋、海防道最多人聚習嘅唔係藥房，呢種本應屬於正常嘅情境如今竟然變得難能可貴。

細細個老師話我知香港之所以成功，除左因為維多利亞港水深港闊之外，就係因為香港人刻苦耐勞。係，高官們咁都仲可以叫人包容就知香港人有幾刻苦耐勞，但到底我地仲要捱幾多苦？香港人以後嘅日子仲可以點樣過？眼見本應屬於我地嘅地方不斷被佔據，被蠶食，可以做嘅就只有喺每年唯一無蝗禍嘅日子裡面，偷偷地出黎見一下我地本應熟悉嘅地方，懷勉一下過去對呢個地方嘅感情，回憶一下曾經喺呢個地方經歷過嘅一點一滴。

但願如電視廣告所講，「一個海港，只有一個海港城」。

希望我地失去嘅只係一個海港城。

半單身

情人節過後，facebook 上面狂風掃落葉式嘅 Honey豬豬 BB Sweet Sweet Post 終於告一段落。我明白，你地真係好開心好 Sweet，如果我係你可能我都會 Post 返一兩張相上去耀武揚威。但對於今年「半單身」嘅基斯坦奴，呢種 Post 實在令我內心長滿葡萄樹，數量直迫法國南部某大酒莊。

咩叫做「半單身」？一般黎講，可以被介定為 Single 同 In a relationship 之間。即係點？即係好似有女朋友、又好似一支公咁。好虛無？再簡單啲講，有人會稱之為「曖昧」，但我始終認為用「做兵」黎形容比較貼切。

幸好嘅係，基斯坦奴當嘅兵種同一般嘅有少少唔同，應該算係兵長，地位比較高，可以佔領女神大部份時間，而基斯坦奴心中嘅女神，我地就係度叫佢做 「Christine」。

由2月12日開始直到2月14日晚，一連三晚我都接左 Christine 放工，13號晚 Christine 仲上左小弟屋企食我煮嘅宵夜，然後攬住佢挨喺 L 型大梳化，聽住歌、傾住計，一齊過十二點，一齊渡過情人節嘅第一個小時，你話係唔係好浪漫呢。

到左情人節當晚，正當基斯坦奴滿心歡喜，拎住紮花，準備以一個勝利者姿態出現接 Christine 放工嘅時候，Christine 竟然捧住另一紮花係對面馬路行過黎。本來要送出嘅驚喜，剎那間變得全無意義，心裡不禁大叫一聲 WTF ，但 Christine 一步一步咁走近，我唯有故作鎮定，神態自若咁同佢講

「咦，你有花收喎。」
「係呀，有個客送。間唔中都有客送花，唔係咩出奇事。」Christine 大方得體咁回答
「我都準備左花，但唔知你鍾唔鍾意呢。」我只好笨拙咁指住車中乘客位上面孤獨嘅花束。

Christine無特別興奮，好似世事都早已給她看透了一樣，當其時我仲有少少懷疑佢可能會心諗：「你條蛋散真係送花，我邊有咁多手拎？」但 Christine 都好有禮貌咁接過花，上左車，而街上嘅路人亦都親眼見證一個男仔，送花俾一個手上已經有一大紮花嘅女仔。就喺情人節呢一晚，我覺得所有路人嘅眼神都好似 689 一樣，好險惡、而又充滿嘲笑。


原來，事情仲未完結......


第二朝起身，除左鬧鐘以外，第一時間打開嘅就係 Instagram，睇下 Christine有無咩新 update。
打開 Instagram 向下一掃，見到嘅係 Christine 甜得可以令人溶化嘅笑容，加上一句簡單嘅 「Happy Valentine's Day」，而相中嘅 Christine 仲拎住三紮花。

我無打錯，你都無睇錯，係三紮。直到我車到 Christine 返屋企，佢手上都只係得兩紮花。喺個一刻我決定要以我爺爺嘅名義發誓，一定要查到第三紮花嘅來源同埋出現時間。


「你第三紮花係幾時收架？」我單刀直入咁問
「尋晚返左屋企之後，有個朋友渣車入黎送俾我。不過你唔好諗多，佢真係普通朋友黎架咋，佢仲叫我介紹女仔俾佢識架。」


可能我鬼仔性格啦，我真係唔知原來喺香港，普通朋友係會喺情人節晚等到半夜三點渣車去個女仔屋企樓下，就係為左送花。





半單身情人節過去，一切回復正常，基斯坦奴同 Christine 嘅關係又再重回起點，過去三日嘅親暱、甜蜜，隨住2月15日嘅來臨，毫無聲色地與情人節下嘅單身寂寞一同散去。

兩脇插刀

正如我所講，兄弟就係咁簡單，係你有心事嘅時候會隨時出現係你門口。

經過情人節一役，賠了夫人做了兵，唔開心在所難免。最好嘅朋友會義無反顧，因為你一句「我今晚想死」就立刻黎陪你死，仲有外賣芝士焗龍蝦同大量零食做貢品。

還記得呢位兄弟，已經唔知陪我渡過幾多個寂寞嘅晚上 (非hehe)，慶幸嘅係，係大家失意嘅時候，總有對方在身邊。今晚有d醉，但今晚真係好盡興，亦都將呢段時間嘅壓抑全部舒發，好暢快。

人生有個真正朋友的確好極，飲勝！

與月球對話的第一次

第一次用心咁寫Blog、第一次係內心以外嘅空間表達自己、第一次咁想用文字記得自己呢一刻嘅感覺、第一次.......很多的第一次。

純為個人宣洩及分享，絕對無意與現實生活圈子認識嘅人在此打交道，因此以「基斯坦奴」為筆名 (經常幻想自己有C朗一半咁靚仔/多女)。但如果你因為某種原因睇到呢個Blog，亦都花左幾分鐘寶貴嘅時間睇到呢一段嘅話，基斯坦奴亦深表感謝，亦希望多多見諒小弟不才，由於語文程度太差，可能會出現極大量錯別字及奇怪文法。

細細個鍾意寫 xanga, 慢慢到 facebook，其實都係想俾熟人睇。放吓歌詞扮吓情深，寫幾句懶有意境嘅說話實質志在媾女。每次睇返，除咗覺得非常幼稚之外、原來係會令人會心微笑。從前嘅幼稚、坦率、自我、MK、自大......全不復再。面對三十歲嘅來臨，剩低嘅只有職場上生存嘅小技倆，慢慢將自己最真嘅一面收埋係心深處。還好，基斯坦奴身邊仲有好幾個喺你就快面臨崩潰嘅時候，會帶大量啤酒、紅酒、白酒、威士忌，自動自覺出現喺你屋企門口務求與你同年同月同日死嘅老友。


喺呢度，我希望將自己最真實嘅感覺同想法記錄，亦都希望幾年後，睇返呢個 Blog，仍然可以帶俾自己一個真切嘅會心微笑。如果各位路人日後發現原來你認識基斯坦奴本人，你亦唔需要話俾我知你知道，就當係我同你之間分享嘅一個小秘密。